प्रचण्डको सत्तायात्राः थोरै अवसर, धेरै चुनौति

4

मुलुकको ३३ औं प्रधानमन्त्रीका रुपमा ०६५ भाद्र २ गते सपथ खाइरहँदा सायद प्रचण्डको आँखामा नेपाललाई स्वीजरल्याण्ड बनाउने एउटा मीठो सपना थियो । दृढइच्छाशक्ति र अपूर्व संकल्पका साथ उनले देश र जनताका नाममा सपथ त खाए, तर पछि उनले आफ्नो त्यो इच्छाशक्तिलाई तत्कालीन नेपालको भूराजनीतिमा ‘फ्यूजन’ गर्न सकेनन् ।

भावनाको वेगमा प्रचण्ड कहिले अघि भए, त कहिले पछि परे । अन्ततः तत्कालीन नेपालको सन्दर्भमा उनको मार्गचित्र फेल भयो । राष्ट्रपतिको निर्वाचनमा राजनीतिक सन्तुलनको हेक्का नराख्नु ।

युद्धबाट शान्ति प्रक्रियामा रुपान्तरण हुन नपाउँदै राष्ट्रिय राजनीतिको अन्तरवस्तुलाई नबुझिकन सेनाको संगठनमाथि हस्तक्षेप गर्नु र पशुपतिमा भट्ट नियुक्तिको चरम विवाददेखि धेरै राजनीतिक र गैरराजनीतिक उल्झनमा पर्नु । त्यतिबेला प्रचण्डको सत्ता बहिर्गमनका प्रमुख कारणहरु यिनै थिए ।

तर, नेपाली राजनीतिको आठ बर्षे यात्रापछि आज उनै पुष्पकमल दाहाल ‘प्रचण्ड’ प्रधानमन्त्रीको उही कुर्चीमा पदासीन हुनका लागि तयार भएका छन् । उनीसँग नेपालको आमूल परिवर्तनका लागि आठ वर्षअघिका तिनै सपना र तिनै योजनाहरु हुबहु पक्कै छैनन् होला । किनकि यो आठ वर्षमा बाग्मतीमा धेरै पानी बगिसकेको छ । राजनीतिका धेरै मोड र घुम्तीहरु फेरिएका छन् ।

कुनैबेला आफ्नो पार्टी राजनीतिको प्रधान शत्रु भनेर किटान गरेको नेपाली कांग्रेसलाई आज आफ्नो प्रमुख सारथी बनाएर प्रचण्ड सत्तारोहण गर्न तयार छन् । तर, नेकपा माओवादी केन्द्रका अध्यक्ष प्रचण्डका निम्ति अबको बस्तुगत परिस्थिति र राजनीतिक सन्दर्भ पनि सहज नभएर जटिल एवं जोखिमपूर्ण देखिन्छ ।

प्रचण्ड राजनीतिका निकै कुशल खेलाडी मानिन्छन् । समय र परिस्थितिलाई आँकलन गरेर तुरुन्त निर्णय लिन सक्ने अर्थात आफूलाई समयसापेक्ष बदल्न सक्ने क्षमता उनमा छ । आजभन्दा नौ महिना पहिला एमाले अध्यक्ष केपी शर्मा ओलीलाई सत्तासीन बनाउन उनले निकै ठूलो भूमिका खेलेका थिए । तर, नौ महिने सहयात्राबाट बिच्किएको ओली-प्रचण्ड गठबन्धन अहिले दुई ध्रुवमा विभाजित छ । हिजोको ओली सरकारको बलियो खम्बाको रुपमा परिचित प्रचण्डले यतिखेर काँग्रेसलाई साथमा लिएर आफ्नै  नेतृत्वमा सरकार त बनाउँदैछन् ।

तर, अब बन्ने सरकारमा उनको चातुर्यता र कुशलताले मुलुकलाई सफलताको नयाँ दिशामा लैजान्छ वा अरु विगार्छ, त्यो भन्न सकिने अवस्था छैन ।

हजारौं व्यक्तिले दिएको बलिदान र तिनैका अनाथ सन्तान र विधवा पत्नीहरुको आँशुलाई प्रचण्डले आफ्नो शासन पद्दतिमार्फत कसरी सम्बोधन गर्ने ? त्यो पनि उनको अबको कार्यदिशा अवश्य हुनुपर्दछ

जतिबेला ०६२/६३ को जनआन्दोलन पछि प्रचण्ड नेपालको खुला राजनीतिमा आए, त्यतिबेला यो देशका अतिविशिष्ठ व्यक्तिहरुले समेत प्रचण्डको खुलेर प्रशंसा गरे । राजनीतिमा एक असामान्य नेताको छवि बनाएका प्रचण्डले संविधानसभा निर्वाचन ०६४ मा दुई ठाउँबाट चुनाव समेत जिते । र, उनी पहिलोपटक देशको प्रधानमन्त्री भए । तर, शान्ति प्रक्रियाको पूर्वार्द्धमा प्रचण्डको चम्किँदो छवि धेरै समयसम्म टिक्न सकेन । विस्तारै उनका प्रशंसकहरु आलोचकका रुपमा देखा परे ।