जग्गाको विषयमा कुटपिट

7

संतोष रन्जितकार
वीरगंज, ८ माघ ।
वीरगञ्ज पर्साको पोखरीया नगरपालिका ९ शिवबर्वा टोलमा जग्गाको विषयमा विवाद भई कुटपीट हुँदा घाइते भएकाहरुले न्याय नपाएको गुनासो गरेका छन् । उनीहरुले प्रहरीमा उजुरी दिए पनि कुनै किसिमको सुनुवाई नभएको बताए । किता नं १४ र १५ पक्षधरबीचको विवादले उग्र रुप लिँदा माघे संक्रान्तिको दिन झडप भएको थियो । गाउँको ४ कठ्ठा ५ धुर एैलानी जमिनमा बसोवास गर्दै आएका गीता पण्डित र रुदल पण्डित कुवँर पक्षबीच झडप भएको थियो । कित्ता छुट्याइएको भए पनि केहीले लालपुर्जा भने नबनाएको बुझिएको छ ।
झडपमा गीता पण्डित पक्षका ससुरालीमा बस्दै आएका हरेन्द्र पण्डित, धनीलाल पण्डित, हरिलाल पण्डित, श्रीकान्ती देवि र फुलमतीदेवी घाइते भएका छन् । उनीहरुलाई अर्को पक्षका बद्रि, भरत, वृजकिशोर पण्डितले लाठी र हातखुट्टाले कुटपीट गरेको पीडित पक्षको आरोप रहेको छ ।
आप्mनो ससुराली परिवार लामो समयदेखि १५ नं कित्ताको १० धुर जमिनमा बसोबास गर्दै आएको भए पनि अर्को पक्षले उक्त जग्गा आप्mनो भन्दै कुटपीट गरेको हरिन्द्रले गुनासो गरे । जग्गाको बारेमा अदालतमा मुद्दा समेत चलिरहेको उनले बताए । अर्को पक्षले त्यो पनि आफूहरुकै जग्गा भएको दावी गर्दै पहिलो पक्षमाथि आक्रमण गरेका थिए । कुटपीटबाट उनको खुट्टा भाँच्चिएको छ ।
पोखरीया नगरपालिकाको न्यायिक समितिमा वडा कार्यालयले जग्गाको सिफारिस नगरेको उजुरी परेको थियो । दुई पटक समस्या समाधानका लागि छलफल गराए पनि कुनै निकास न निस्किएपछि उपप्रमुख एवं न्यायिक समिति संयोजक सलमा खातुन माघ १ गते स्थलगत निरीक्षणमा पुगेकी थिइन् । संयोजक खातुनकै अगाडी दुवै पक्षले झगडा समेत गरेका थिए । उपप्रमुख खातुनले भने समस्याको निकास निकाल्न खोज्दा उनीहरु उग्र बनेको बताइन् ।
जग्गाको विषयमा अदालतमा मुद्दा विचाराधीन रहेछ, त्यसमा न्यायिक समितिले हस्तक्षेप गर्ने कुरा भएन’ उनले भनिन् तैपनि आपसी सहमतिबाट निकास निस्कन्छ कि भनेर दुईपटक छलफल पनि गराएँ, तेस्रो पटक जग्गाको स्थलगत निरीक्षणमा गएको समयमा मेरो मर्यादाको समेत ख्याल नराखी आपसमै लडेको उनले बताइन् ।
जिल्ला प्रहरी कार्यालय पर्साका डिएसपी अनन्त शर्माले भने प्रहरीले जग्गा विवादका मुद्दामा शान्ति सुरक्षा कायम गराउने जिम्मेवारी मात्रै रहेको बताए । जग्गा विवाद हामीले मिलाउने होइन, शान्ति सुरक्षा र कानुनी सरसल्लाहको पाटो मात्रै हाम्रो रहेको शर्माले बताए । शर्माले कुटपीटबाट अंगभंग भएको भए पीडित पक्षले मुद्दा समेत दर्ता गराउन सक्ने उनको भनाइ रहेको थियो ।