आवाज एफ.एम.को तेस्रो वार्षिकोत्सवमा फुटबल प्रतियोगिताको आयोजना

26

संतोष रन्जितकार
वीरगंज, २८ चैत ।
आवाज एफ.एम ८८ मेगाहर्जको तेश्रो वार्षिकोत्सवको अवसरमा बिहिवार पत्रकार र जनप्रतिनिधी बीच मैत्रीपुर्ण फुटबल प्रतियोगिताको आयोजना गरेको छ । संघिय प्रहरी इकाई गुल्मको खेल मैदानमा आयोजित मैत्रीपुर्ण खेलमा पत्रकारहरुको टिम विजयी भएको हो । पत्रकारहरुले जनप्रतिनिधीहरुको टिमलाई शुन्यको विरुद्ध चारगोल अन्तरले पराजित गरेका हुन ।
पत्रकारहरुको तर्फबाट भुषण यादवले तीनगोल र तुल्सीभण्डारीले एक गोल गरेका थिए । मध्यान्ह अघि तीन गोल र त्यसपछि एक गोल पत्रकारहरुको टिमले गरेका थिए । मैत्रीपुर्ण फुटबल खेलको शुभारम्भ वीरगंज महानगरपालिकाका मेयर विजय कुमार सरावगी, पर्सा क्षेत्र नम्बर १ का सांसद प्रदिप यादव, पुर्व सांसद बिचारी यादव, पर्साका प्रमुख जिल्ला अधिकारी नारायण प्रसाद भट्टराईले संयुक्त रुपमा गरेका थिए । प्रतियोगितामा जनप्रतिनिधीको तर्फबाट सांसद यादव र प्रदेश सभा सदस्य ओमप्रकाश शर्मा पनि सहभागि थिए ।


एफएमका अध्यक्ष श्याम बञ्जाराको अध्यक्षतामा सम्पन्न भएको प्रतियोगितामा प्रदेश सभा सदस्य राजेश्वर साह तेली, जिल्ला समन्वय समितिका अध्यक्ष नेक महमद अन्सारी, पोखरिया नगरपालिकाका मेयर दीपनारायण रौनियार, बहुदरमाई नगरपालिकाका मेयर नितेन्द्र साह, सखुवा प्रसौनी गाउँपालिकाका अध्यक्ष प्रदिप जयसवाल, जगरनाथपुर गाउँपालिकाका अध्यक्ष जालिम मियाँ, जिराभवानी गाउँपालिकाका अध्यक्ष रामप्रित महतो, पटेर्वा सुगौली गाउँपालिकाका अध्यक्ष हरिनारायण चौधरी, पत्रकार महासंघका प्रदेश संयोजक दीपेन्द्र चौहान, नेकपा नेता बसरुदिन अंसारी, सेनानी सृजन बहादुर मल्ल, ओबिसी पर्सा अध्यक्ष अकलेश साह लगायतको सहभागिता रहेको थियो ।