घाइते मुस्कानको बारेमा सांसद यादवको चासो

16

संतोष रन्जितकार
वीरगंज, २७ असोज ।

पर्सा क्षेत्र नं १ का सांसद प्रदिप यादवले पर्सेली सञ्चारकर्मीहरुको रोहबरमा सोमबार पर्साका प्रहरी उपरीक्षक सोमेन्द्रसिंह राठौरसंग भेटेर मुस्कान खातुन माथि भएको एसिड प्रहारको घटनाबारे प्रहरीको अनुसन्धान र मुद्दाको प्रकृयाको बारे जानकारी लिई दोषीलाई कानुन बमोजिम कारवाही गर्नेु पर्ने माग गरेका छन् ।
गत भदौ २० गते घरबाट विद्यालय गइरहेको अवस्थामा वीरगंज २ छपकैयाका मुस्कान माथि दुई युवकहरुले तेजाब प्रहार गरी गम्भीर घाइते बनाएका थिए । हाल मुस्कानको काठमाडौंको किर्तीपुर अस्पतालमा उपचार भइरहेको र अवस्था सधारोन्मुख रहेको छ । तर मुस्कान घटनाका अभियुक्त द्वय समसाद मिया र मजिद मियालाई सजायको सवालमा सांसद यादवले प्रहरी उपरिक्षक राठौरसंग उनीहरुको मुद्दाको विषयमा जानकारी लिएका थिए ।
वीरगंज नारायणी अस्पतालका ४ जना डाक्टरहरुले समसादको उमेर १८ वर्ष र मजिदको उमेर २० वर्ष मेडिकल रिपोर्टमा उल्लेख गरेपनि परिवारजनले दुबैको उमेर क्रमशः १४ र १५ वर्ष भनी नाबालिक भएकोले सोही अनुसारको सजायको लागि लबिङ गरिरहेका छन् । नारायणी अस्पतालका मेडिकल सुपरिटेन्डेन्ट डा. मदनकुमार उपाध्याय, डेटिस्ट सोनी झा, अर्थोपेडिक डा. राजदेव कुशवाहा, रेडियोलोजिस्ट डा. विजयराज खनाल लगायतले मेडिकल रिपोर्टमा उमेर प्रमाणित गरेका हुन् । तर पर्सा प्रहरीले पनि प्रारम्भिक अनुसन्धानको क्रममा समसादको उमेर १७ र मजिदको उमेर १६ वर्ष मात्र तोकेको प्रति सांसद यादवले चिन्ता व्यक्त गरे ।
त्यसैगरी पर्सा प्रहरीले दशैको विदालाई देखाउ“दै अनुसन्धानमा ढिलाई भई पर्सा जिल्ला अदालतमा मुद्दाको फाइल पेश नगरेको स्पष्टिकरण दिएको थियो । पर्साका प्रहरी उपरीक्षक राठौरले पक्राउ परेका अभियुक्तलाई कानुन बमोजिम नै कारबाही गरिने आश्वासन दिए । उनले २२ देखि २५ दिन भित्र जुन पनि मुद्दा अनुसन्धान गरेर अदालतमा पेश गर्नु पर्ने नियम रहेतापनि चाडपर्वले केही दिन ढिलाई हुदै ३७ दिन पुगेको तथा आजभोलीमै मुद्दाको फाइल अदालतमा पेश गरिने उनले जानकारी दिए ।
यता विर्तामा सञ्चालित हार्डवेयर पसले मनीषप्रसाद मण्डलको नाममा पक्राउ पुर्जी जारी भइसकेको र उनको खोजी कार्य भइरहेको प्रहरीले जनाएको छ । विना स्वीकृति तेजाब तथा रसायनिक पदाथ बिक्री गरेको आरोपमा उनी माथि ज्यान सम्बन्धी मुद्दा र तेजाब खुल्ला रुपमा बिक्री गरेको मुद्दा लगाइएको पर्सा प्रहरीले जनाएको छ । कानुन बमोजिम ज्यान सम्बन्धी मुद्दामा १० वर्ष कैद सजाय हुने व्यवस्था छ ।
यससंगै स्कुल/क्याम्पसका छात्राहरु माथी हुने गरेको दुर्व्यवहारका घटना तथा यौनजन्य हिंसा नियन्त्रणको लागि पर्सा प्रहरीले ठोस कदम चाल्नु पर्ने प्रहरी उपरिक्षक राठौरलाई निर्देशन समेत दिनु भएको थियो ।