भारतको कुख्यात गुण्डानाइके विकास दुबे पक्राउ

12

एजेन्सी,नयाँदिल्ली

भारतको कानपुरमा आठ जना प्रहरीको हत्या गरेर फरार रहेका विकास दुबे पक्राउ परेका छन। भारतको उज्जैनबाट उत्तर प्रदेशका कुख्यात गुण्डानाइके विकास दुबे पक्राउ परेका छन् ।

भारतीय सञ्चारमाध्यमका अनुसार उनी महाकालको दर्शनका लागि उज्जैन गएका थिए, त्यहाँको सुरक्षा गार्डले उनलाई चिनेका थिए । त्यसपछि तत्काल प्रहरी एक्सनमा आएर उनलाई पक्राउ गरिएको बताइएको छ ।

प्रहरीलाई पनि दुबे महाकाल मन्दिरमा दर्शन गर्न गएको समाचार प्राप्त भएको थियो । उत्तर प्रदेशले विकास दुबेलाई बाहिर जान नदिन सीमा क्षेत्रमा कडाइ गरिएको बताए पनि दुबे मध्य प्रदेशको उज्जैनसम्म पुगेका हुन् ।

दुबेको गिरफ्तारीको विषयमा विस्तृत जानकारी नदिइएको भए पनि मध्य प्रदेशको प्रहरीले उनको पक्राउको पुष्टि गरेको छ ।भारतीय प्रहरीले दुबेबारे सूचना दिनेलाई दुई लाख ५० हजार रुपैयाँ भारू पुरस्कार दिने घोषणासमेत गरेको थियो।

गत मंगलबार दुबे हरियाणको फरिदाबादको एक होटलमा देखिएका थिए । त्यहाँबाट भागेर उनी मध्यप्रदेश पुगेका हुन् । यसैबीच बिहीबार नै कानपुर र इटावामा गरी दुई इन्काउन्टर भएको छ । प्रहरीसँगको यी दुई  इन्काउन्टरमा दुबेका दुई सहयोगी पनि मारिएका छन् ।