सुनको मूल्यमा ऐतिहासिक वृद्धि, प्रतितोला १ लाख ८१ हजार नाघ्यो

काठमाडौं ।

बिहीबार सुनको मूल्यमा उल्लेखनीय वृद्धि भएको छ । अघिल्लो दिन तोलामा २ हजार रुपैयाँले बढेको सुनको मूल्य आज एकै दिन ५ हजार ७ सय रुपैयाँले उकालो लागेको हो ।

बुधबार प्रतितोला १ लाख ७५ हजार ४ सय रुपैयाँमा कारोबार भइरहेको सुन बिहीबार १ लाख ८१ हजार १ सय रुपैयाँमा पुगेको छ । यो मूल्य अहिलेसम्मकै उच्च हो ।

यसअघि गत शुक्रबार सुनको मूल्य प्रतितोला १ लाख ८० हजार ३ सय रुपैयाँ पुगेको थियो, जुन हालसम्मको उच्चतम दर मानिन्थ्यो ।

यसैगरी, चाँदीको मूल्य पनि ६५ रुपैयाँले वृद्धि भएर अघिल्लो दिनको १ हजार ८३५ रुपैयाँबाट बढेर आज १ हजार ९ सय रुपैयाँमा पुगेको छ ।