दाहालको सम्मानमा कांग्रेसको विशेष महाधिवेशनका औपचारिक कार्यक्रम आजलाई स्थगित

काठमाडौं । नेपाली कांग्रेसको विशेष महाधिवेशनका ओपचारिक कार्यक्रम आजलाई स्थगित भएका छन् ।

नेपाली कांग्रेसका नेता, प्रजातान्त्रिक आन्दोलनका योद्धा एवं अग्रज पत्रकार होमनाथ दाहालको निधन भएका कारण शोक मनाउन आजका औपचारिक कार्यक्रम स्थगित गरिएको संचार तथा प्रचारप्रसारसमिति संयोजक सुवासकुमार पोखरेलले जानकारी दिए ।

दाहालको ८४ वर्षको उमेरमा निधन भएको हो । पोखरेलले भोलि र पर्सी हुने विशेष महाधिवेशन भने यथावत् रहेको जानकारी दिए ।

प्रचारप्रसार सदस्यसचिव माधव चम्लागाईंका अनुसार आज र्यालीसहितका कार्यक्रम आयोजना गर्ने कार्यक्रम थियो ।

विशेष महाधिवेशन भृकुटीमण्डपमा आइतबार र सोमबार हुँदैछ । त्यसका लागि अधिकांश जिल्लाबाट महाधिवेशन प्रतिनिधिहरु काठमाडौं आइसकेका छन् । दोस्रो विशेष महाधिवेशन व्यवस्थापन सचिवालयका संयोजक मनोजमणि आचार्यले दाहालको सम्मानमा आजका पदयात्रा लगायतका सम्पूर्ण औपचारिक कार्यक्रम स्थगित भएको जनाए ।