कार्यसमितिको न्यून उपस्थिति र ‘स्लीपिङ हस्ताक्षर’ विषयमा नेतृत्वमाथि सल्लाहकार झाको गम्भीर आपत्ति

विरगञ्ज ।

नेपाल पत्रकार महासंघ मधेश प्रदेश कार्यसमितिको विहीबार सम्पन्न बैठकमा सदस्यहरूको न्यून उपस्थिति देखिएको भन्दै सल्लाहकार अवधेश झाले सामाजिक सञ्जालमार्फत गम्भीर टिप्पणी गर्नुभएको छ।

२१ सदस्यीय कार्यसमितिमध्ये केवल ७ सदस्य मात्र शारीरिक रूपमा उपस्थित हुँदा बैठकको वैधानिकता र निर्णय प्रक्रियाप्रति प्रश्न उठेकोमा उनले सामाजिक सञ्जालमा लेखेरै गम्भीर चिन्ता व्यक्त गरेका छन् ।

बैठकमा शारीरिक रूपमा उपस्थित हुन नसकेका अधिकांश सदस्यका नाममा दैनिक कार्यविधी सुनेर होइन, स्लीपिङ हस्ताक्षर (Sleeping Signatures)को आधारमा उपस्थिति देखाइएको आरोप लागेको छ । यसले निर्णयहरू कत्तिको प्रतिनिधिमूलक र वैध छन् भन्ने विषयमा शंका उत्पन्न गरेको छ।

बैठकका साक्षीका रूपमा महासंघका केन्द्रीय अध्यक्ष निर्मला शर्मा, महासचिव रामप्रसाद दाहाल, कोषाध्यक्ष रामकृष्ण अधिकारी र लेखा समिति संयोजक केसी लामिछाने उपस्थित रहेको उल्लेख गरिएको छ ।सल्लाहकारका रूपमा अवधेश झा र राजेश कर्ण सहभागी भए भने अर्का सल्लाहकार नेपाल पत्रकार महासंघ मधेश प्रदेशका संस्थापक अध्यक्ष दीपेन्द्र चौहानलाई बैठकको जानकारी नै थिएन ।

सल्लाहकार अवधेश झाका अनुसार, “जस संस्था सत्य, पारदर्शिता र जवाफदेहिताको मूल्यमा टेकेको छ, त्यही संस्थाको बैठकमा यस्तो उपस्थिति संकट हुनु गम्भीर विषय हो। उपस्थिति कम, तर कागजी हस्ताक्षर बढी देखिनु नेतृत्व क्षमतामाथि प्रश्न हो,” उनले टिप्पणी गरे।

यस घटनाले मधेश प्रदेशको नेपाल पत्रकार महासंघको बैठक बारे बिभीन्न शंका उपशंका जन्माउनुको साथै नेतृत्व क्षमता माथि गम्भीर प्रश्न चिन्ह खडा गरेको छ ।