सतलोक आश्रममा सुरु भयो तीनदिने कबीर प्रकट दिवस आध्यात्मिक महोत्सव

धनुषा,जेठ २६ ।

मधेस प्रदेशस्थित सतलोक आश्रम, धनुषामा परमेश्वर कबीर साहेबको ६२८औँ प्रकट दिवसको अवसरमा तीनदिने आध्यात्मिक महोत्सव सुरु भएको छ। सन्त रामपाल जी महाराजको मार्गदर्शनमा आयोजित यस महोत्सवको पहिलो दिन आज बिहान ९:१५ बजे गरीबदास जी महाराजद्वारा रचित ‘अमर ग्रन्थ साहिब’को अखण्ड पाठबाट कार्यक्रमको विधिवत् सुरुआत गरिएको हो।

महोत्सवमा देशका विभिन्न भागबाट हजारौँ श्रद्धालु भक्तजनहरूको उपस्थिति रहेको छ। आश्रम परिसरमा विशाल भण्डारा सञ्चालनमा रहेको छ, जहाँ शुद्ध घ्यू प्रयोग गरेर तयार पारिएका परिकारहरू निःशुल्क रूपमा श्रद्धालुहरूलाई वितरण गरिएको छ। उपस्थित श्रद्धालुहरूले भोजन, सरसफाइ र सम्पूर्ण व्यवस्थाप्रति सन्तोषजनक प्रतिक्रिया दिएका छन्।

कबीर साहेबको जीवन, शिक्षासँग सम्बन्धित आध्यात्मिक प्रदर्शनी तथा सन्त गरीबदास जी महाराजका वाणीहरूको अखण्ड पाठ हुने “दरबार साहिब” मञ्च महोत्सवको मुख्य आकर्षण बनेको छ। साथै, श्रद्धालुहरूका लागि बसोबास, पिउने पानी, शौचालय लगायतका आधारभूत सुविधाहरूको राम्रो व्यवस्था गरिएको आश्रम व्यवस्थापनले जनाएको छ।

महोत्सवको दोस्रो दिन जेठ २७ गते, दाइजोमुक्त विवाह कार्यक्रम तथा रक्तदान शिविर आयोजना हुनेछ भने अन्तिम दिन जेठ २८ गते, कबीर प्रकट दिवसको मुख्य समारोह भव्य रूपमा सम्पन्न हुने आयोजकले जनाएका छन्।