एमालेलाई सडकमा अराजकता र विध्वंस नगर्न रक्षा बमको अपिल

विरगंज ।

नेपाल जेनजी फ्रन्टकी संयोजक रक्षा बमले नेकपा (एमाले)लाई सडकमा अराजकता र विध्वंस नगर्न अपिल गरेकी छन्। पार्टी अध्यक्ष एवं पूर्वप्रधानमन्त्री केपी शर्मा ओलीको रिहाइका लागि भइरहेको आन्दोलनलाई लक्षित गर्दै उनले सामाजिक सञ्जालमार्फत देशले विगतमा (भदौ २३ र २४ गते) निकै विध्वंस देखिसकेको र अब त्यस्तो अवस्था दोहोरिन नहुने बताएकी हुन्।

उनले राजनीतिक मुद्दाभन्दा देश माथि हुने उल्लेख गर्दै यदि यो प्रक्रिया प्रतिशोध जस्तो लागेको भए कानुनी बाटो रोज्न र अदालतमा सत्य प्रमाणित गर्न एमालेका कार्यकर्ताहरूलाई सुझाव दिएकी छन्। सरकारसँग असहमति राख्न पाउनु लोकतान्त्रिक अधिकार भए पनि थप अराजकता र द्वन्द्वले देशको जग नै कमजोर बनाउने उनको तर्क छ। संयोजक बमले शान्तिपूर्ण प्रदर्शनको अधिकारको सम्मान गर्दै बाटो हिँडिरहेका सर्वसाधारणमाथि आक्रमण गर्ने, सडक अवरोध गर्ने र सवारी साधन जलाउने जस्ता गतिविधिले पार्टीको नैतिक आधारलाई मात्र कमजोर बनाउने उल्लेख गरेकी छन्।

उनले समाजमा जिम्मेवार, उत्तरदायी र लोकतान्त्रिक चरित्र बोकेको एमालेको आवश्यकता रहेको भन्दै मुलुकमा भर्खरै स्थिरताको अनुभूति हुन थालेको अवस्थामा थप ध्वंसात्मक गतिविधि नगर्न आग्रह गरेकी छन्।