नाका अनुगमनसँगै उद्योगीका समस्या सुन्न अर्थमन्त्री वाग्ले वीरगञ्ज आउँदै

वीरगञ्ज ।

मुलुकको प्रमुख आर्थिक नाकाको वस्तुगत अवस्था बुझ्न र अर्थतन्त्र सुधारका सम्भावनाहरू पहिल्याउन नवगठित सरकारका अर्थमन्त्री डा. स्वर्णिम वाग्ले आज वीरगञ्ज आउँदैछन्। पदभार ग्रहण गरेलगत्तै राजस्व संकलन र व्यापार सहजीकरणलाई उच्च प्राथमिकतामा राखेका उनी हवाईमार्गमार्फत सिमरा विमानस्थल हुँदै वीरगञ्ज आइपुग्ने कार्यक्रम छ। अर्थमन्त्रीका रूपमा उनको यो भ्रमणले सुस्ताएको आर्थिक गतिविधिलाई लयमा फर्काउन मद्दत पुग्ने अपेक्षा गरिएको छ।

अर्थ मन्त्रालयका अनुसार मन्त्री वाग्लेको यस भ्रमण मुख्यतया सीमा क्षेत्रको व्यापारिक अवस्थाको सूक्ष्म मूल्याङ्कन, राजस्व संकलनका चुनौतीहरूको समीक्षा र लगानीमैत्री वातावरण निर्माणमा केन्द्रित हुनेछ। यस क्रममा उनले वीरगञ्जस्थित एकीकृत जाँच चौकी (आईसीपी), वीरगञ्ज भन्सार कार्यालय र सिर्सिया सुक्खा बन्दरगाह (ड्राइपोर्ट) को स्थलगत अनुगमन गर्ने तय भएको छ। अन्तर्राष्ट्रिय व्यापारमा देखिएका नीतिगत तथा व्यावहारिक अड्चन हटाउँदै भन्सार प्रशासनको सेवा प्रवाहलाई थप चुस्त बनाउने विषयलाई मन्त्री वाग्लेले विशेष महत्त्व दिएका छन्।

स्थलगत अनुगमनका साथै अर्थमन्त्रीले दिउँसो १ बजे वीरगञ्ज उद्योग वाणिज्य संघको सभाहलमा स्थानीय उद्योगी–व्यवसायीहरूसँग प्रत्यक्ष अन्तरक्रिया गर्नेछन्। निजी क्षेत्रका प्रतिनिधिहरूसँगको छलफलमा व्यवसायीहरूले भन्सार प्रक्रियामा हुने ढिलासुस्ती, बढ्दो ढुवानी लागत र नीतिगत अस्पष्टताजस्ता समस्या समाधानका लागि मन्त्रीसमक्ष ध्यानाकर्षण गराउने तयारी गरेका छन्। सोही अवसरमा मन्त्री वाग्लेले राजस्व वृद्धि र निजी क्षेत्रलाई प्रोत्साहन गर्ने सरकारको आगामी योजनाबारे जानकारी गराउनेछन्।