सुन तोलामा ११,६०० रुपैयाँ घट्यो

काठमाडौं।

तिहार पर्वपछि नेपाली बजारमा सुनको मूल्य तोलामा ११ हजार ६ सय रुपैयाँले घटेको छ। नेपाल सुनचाँदी व्यवसायी महासंघले आइतबार सुनको भाउ प्रतितोला २ लाख ४१ हजार ९ सय रुपैयाँ कायम गरेको छ।

तिहारअघि, कात्तिक ३ गते सुनको भाउ प्रतितोला २ लाख ५३ हजार ५ सय रुपैयाँ थियो। यो मूल्य समायोजन तिहारपछि पहिलोपटक आइतबार गरिएको हो।

अन्तर्राष्ट्रिय बजारमा कात्तिक ४ गते सुनको भाउ करिब ५ प्रतिशत घटेको थियो। असोज ३ गते सुनको मूल्य प्रतिऔंस ४,३५८ अमेरिकी डलर पुगेको थियो भने हाल ४,१११ डलरमा रहेको छ। (१ औंस करिब २.४३ तोलासम्मको बराबर हुन्छ।)

नेपालमा सार्वजनिक विदा हुँदा महासंघले कात्तिक ४ गतेदेखि मूल्य समायोजन नगरेको थियो, जसको असर आइतबार मात्रै देखिएको हो। असोज ३१ गते सुनको भाउ तोलामा २ लाख ५८ हजार रुपैयाँसम्म पुगेर हालसम्मकै उच्च रेकर्ड बनाएको थियो।

त्यसैगरी, चाँदीको भाउ प्रतितोला २६५ रुपैयाँले घटेर ३ हजार १५ रुपैयाँमा कायम भएको छ। तिहारअघि चाँदीको मूल्य ३ हजार २८० रुपैयाँमा कारोबार भएको थियो भने असोज ३१ मा यो ३,३५० रुपैयाँमा पुगेर रेकर्ड बनाएको थियो।