कुनै समुदायप्रति अभद्र टिप्पणी गरेको छैन, मिडियाले जबरजस्ती विवाद झिक्यो : अजयकुमार चौरसिया

वीरगंज ।
प्रतिनिधि सभा सदस्य क्षेत्र नं २ का उम्मेदवार तथा पूर्वमन्त्री अजयकुमार चौरसियाले आफूले कुनै पनि समुदाय विशेषलाई लक्षित गरी अभद्र वा गालीगलौजपूर्ण अभिव्यक्ति नदिएको स्पष्ट पार्नुभएको छ। पछिल्लो समय उहाँको एक अभिव्यक्तिलाई लिएर विभिन्न टीकाटिप्पणी भइरहेको सन्दर्भमा चौरसियाले सो आरोपको खण्डन गर्दै आफ्नो भनाइलाई गलत मनसायले व्याख्या गरिएको बताउनुभएको हो। उहाँले आफ्नो अभिव्यक्ति कुनै जात, धर्म वा समुदायको भावनामा ठेस पुर्‍याउने उद्देश्यले नआएको जिकिर गर्नुभयो।
चौरसियाले आफ्नो टिप्पणी नितान्त काठमाडौं महानगरपालिकाका पूर्वमेयर बालेन्द्र शाहको कार्यशैली र प्रवृत्तिमा मात्र केन्द्रित रहेको प्रस्ट पार्नुभएको छ। उहाँका अनुसार, शाहका विषयमा समाजमा आम मानिसले राख्ने धारणा र सामाजिक सञ्जालमा छ्यापछ्याप्ती भेटिने विषयहरूलाई नै आफूले बोलेको तर त्यसलाई अनर्थ लगाइएको हो। एक सार्वजनिक पदमा रहेका व्यक्तिको आलोचना वा टिप्पणी गर्नु लोकतान्त्रिक अधिकार भएको भन्दै उहाँले यसलाई सामुदायिक गालीगलौजको रूपमा चित्रण गर्नु दुर्भाग्यपूर्ण रहेको बताउनुभयो।
केही सञ्चारमाध्यमले जबरजस्ती विषयलाई बङ्ग्याएर बखेडा झिकेको र आफूलाई बदनाम गर्न खोजेको आरोप समेत उहाँले लगाउनुभएको छ। चुनावी माहोलको बीचमा आफ्नो चरित्र हत्या गर्ने र जनमानसमा भ्रम सिर्जना गर्ने उद्देश्यले केही मिडियाले सामान्य राजनीतिक टिप्पणीलाई अतिरञ्जित गरेको उहाँको भनाइ छ। चौरसियाले सञ्चारमाध्यमहरूलाई सत्यतथ्य बुझेर मात्र समाचार सम्प्रेषण गर्न आग्रह गर्दै आफू सदैव सबै समुदायको सम्मानको पक्षमा रहेको प्रतिबद्धता व्यक्त गर्नुभयो।