राजनीतिमा लागेर कसैलाई ठगेको छैन, मेरो व्यापार र राजनीति दुवै पारदर्शी छ: अनिल रुंगटा

वीरगन्ज ।
नेपाली कांग्रेसका तर्फबाट पर्सा क्षेत्र नम्बर १ का प्रतिनिधि सभा सदस्य उम्मेदवार अनिल कुमार रुंगटाले वीरगन्ज महानगरपालिका–१३ स्थित आफ्नो सम्पर्क कार्यालयमा आयोजित एक विशेष कार्यक्रमका बीच आगामी निर्वाचनका लागि ‘चुनावी प्रतिज्ञापत्र’ सार्वजनिक गरेका छन्।

प्रतिज्ञापत्र पढ्‌नको लागि qr स्क्यान गर्नुहोस्

प्रतिज्ञापत्र सार्वजनिक गर्ने क्रममा नेता रुंगटाले आफ्नो राजनीतिक र व्यावसायिक निष्ठामाथि प्रहार गर्नेहरूलाई कडा जवाफ दिँदै आफू सदैव इमान्दारिताको पक्षमा रहेको स्पष्ट पारे। उनले रोजीरोटीका लागि कानुनसम्मत व्यवसाय गर्दै आएको र अहिलेसम्म कसैलाई नठगेको र नधम्क्याएको दाबी गरे। “काम गरेर खानु ठीक कि ठगी गरेर?” भनी प्रश्न उठाउँदै उनले आफ्नो व्यापारिक कारोबार पूर्णतः पारदर्शी र कानुनी प्रक्रिया बमोजिम सञ्चालन भइरहेको बताए। वि.सं. २०४४ सालदेखि नेपाल विद्यार्थी संघबाट राजनीतिक यात्रा सुरु गरेको स्मरण गर्दै रुंगटाले आफू व्यापारमा आउनुअघि नै सक्रिय राजनीतिमा होमिएको र राजनीतिक पृष्ठभूमि नै नभएका तथा विगतमा अवाञ्छित गतिविधिमा संलग्न व्यक्तिहरूले अहिले आफूलाई राजनीतिकर्मी भनी चिनाउने प्रवृत्तिप्रति कडा आपत्ति जनाए।
आफूलाई समाजसेवी र समाजवादी चिन्तन बोकेको व्यक्तिको रूपमा प्रस्तुत गर्दै रुंगटाले व्यक्तिगत स्वार्थका लागि अरूलाई दुःख दिने आफ्नो स्वभाव नरहेको बताए। पछिल्लो समय सिरिसिया नदी प्रदूषणका विषयमा आफूमाथि लगाइएका आरोपहरूको खण्डन गर्दै उनले सतही गफले मात्र गम्भीर समस्याको समाधान नहुने टिप्पणी गरे। आफ्नो उद्योगबाट निस्कने फोहोर पानी उचित प्रशोधन नगरी नदीमा नपठाइने दाबी गर्दै उनले शंका गर्ने जोसुकैलाई पनि टोली बनाएर स्थलगत अवलोकन गर्न चुनौती दिए। यसैगरी, उद्योगमा भारतीय कामदार प्रयोग गरेको भन्ने विपक्षीको आरोपलाई उनले पूर्णतः निराधार रहेको बताए। उद्योगमा कार्यरत ९५ प्रतिशतभन्दा बढी जनशक्ति नेपाली नै रहेको र दक्ष कामदार नेपालमै उपलब्ध रहेकाले विदेशी कामदार राख्नुपर्ने आवश्यकता नरहेको उनले स्पष्ट पारे। भारतीय कामदार राख्दा कानुनी जटिलता र पारिश्रमिक समेत महँगो पर्ने यथार्थ सुनाउँदै उनले स्थानीय र दक्ष नेपाली जनशक्तिलाई नै पहिलो प्राथमिकता दिएको बताए। विरोधीहरूले ठोस मुद्दा नभेटेपछि यस्ता भ्रामक हल्ला फैलाएको भन्दै उनले मतदाताहरूलाई तथ्य र वास्तविकताको आधारमा सही निर्णय लिन र विकास एवं स्वच्छ राजनीतिको पक्षमा उभिन आग्रह गरे।