ट्रम्पको पहलमा इजरायल–हमासबीच गाजामा युद्धविराम सहमति

विरगंज ।

अमेरिकी राष्ट्रपति डोनाल्ड ट्रम्पले इजरायल र हमास दुवैले आफ्नो शान्ति योजनाको पहिलो चरणमा सहमति जनाएको घोषणा गरेका छन्।

ट्रम्पले सामाजिक सञ्जाल ‘ट्रुथ सोसल’ मार्फत भनेका छन्, “यस सम्झौताले सबै बन्धकहरूलाई छिट्टै रिहा गरिनेछ र इजरायलले आफ्ना सेनाहरूलाई सहमति अनुसार फिर्ता लैजानेछ।”

इजरायली प्रधानमन्त्री बेन्जामिन नेतन्याहूले सम्झौतामा भएको सहमतिको स्वागत गर्दै यसलाई इजरायलका लागि ‘ठूलो दिन’ भनेका छन्। उनले सम्झौताका बुँदाहरू अनुमोदन गर्न आज (बिहीबार) सरकारको बैठक बोलाउने तयारी गरेका छन्, बीबीसीका अनुसार।

संयुक्त राष्ट्रसंघका महासचिव एन्टोनियो गुटेरेसले सम्झौतालाई पूर्ण कार्यान्वयनका लागि समर्थन जनाउँदै गाजामा मानवीय सहयोग वितरण र पुनर्निर्माण कार्य तीव्र पार्ने प्रतिबद्धता जनाएका छन्। उनले सबै पक्षलाई सम्झौताका शर्तहरू पालना गर्न आग्रह गर्दै भने, “यो पीडाको अन्त्य हुनै पर्छ।”

गुटेरेसले कब्जा अन्त्य गर्दै प्यालेस्टिनी जनताको आत्मनिर्णयको अधिकार सुनिश्चित गर्न तथा दुई–राज्य समाधानतर्फको विश्वसनीय राजनीतिक बाटो खोल्न यो सम्झौता महत्वपूर्ण अवसर भएको उल्लेख गरे।

बीबीसीलाई एक वरिष्ठ प्यालेस्टिनी अधिकारीले बताएअनुसार, इजरायली सरकारले सम्झौतामा अनुमोदन गरेसँगै जेरुसेलम समय अनुसार दिउँसो करिब २ बजेबाट युद्धविराम लागू हुनेछ। सम्झौता अनुसार, पहिलो पाँच दिनमा दैनिक ४०० सहायता ट्रकहरू गाजामा प्रवेश गर्नेछन् र आगामी चरणहरूमा यो संख्या क्रमशः बढाइनेछ।

हमासले पनि सम्झौतामा सहमति जनाएको र ट्रम्प तथा अन्य संलग्न राष्ट्रहरूलाई इजरायललाई सम्झौताका सबै बुँदाहरू कार्यान्वयन गर्न दबाब दिन आग्रह गरेको छ।

यो सम्झौता इजिप्टमा सम्पन्न भएको हो, इजरायलले ७ अक्टोबर २०२३ को हमलाको जवाफमा गाजामा सैन्य अभियान सुरु गरेको दुई वर्ष र दुई दिनपछि। उक्त हमलामा हमास लडाकुहरूले करिब १,२०० जनाको हत्या गरेका थिए र २५१ जनालाई बन्धक बनाएका थिए।

गजाको स्वास्थ्य मन्त्रालयका अनुसार, त्यसयता इजरायली आक्रमणमा कम्तीमा ६७ हजार १८३ जनाको मृत्यु भइसकेको छ, जसमा २० हजार १७९ बालबालिका रहेका छन्।

साभार: बीबीसी