न्युयोर्क सिटीको मेयरमा ममदानी निर्वाचित

एजेन्सी ।

३४ वर्षीय जोहरान क्वामे ममदानीले संयुक्त राज्य अमेरिकाको सबैभन्दा ठूलो सहर न्युयोर्कको १११औँ मेयरको रूपमा ऐतिहासिक जित हासिल गरेका छन्।

ब्रुकलिनका सम्पन्न गल्लीदेखि क्विन्सका श्रमिक आप्रवासी बस्तीहरूसम्म फैलिएको क्षेत्रमा उनको विजय न्युयोर्कको राजनीतिक इतिहासमा सबैभन्दा उल्लेखनीय परिवर्तनमध्ये एक मानिएको छ।

डेमोक्रेटिक समाजवादी ममदानीले जुन महिनामा सम्पन्न डेमोक्रेटिक प्राइमरीमा पूर्व गभर्नर एन्ड्र्यू एम. कुओमोलाई पराजित गरेका थिए। यससँगै न्युयोर्कवासीहरूले पाँच महिनाभित्र दोस्रो पटक राज्यका शक्तिशाली राजनीतिक व्यक्तित्वलाई अस्वीकार गरेका छन्।

रिपब्लिकन उम्मेदवार कर्टिस स्लिभा भने टाढै तेस्रो स्थानमा सीमित भए।

यो चुनावमा २० लाखभन्दा बढी मतदाताको सहभागिता दर्ता भयो, जुन सन् १९६९ यता सहरमा भएको स्थानीय चुनावमध्ये सबैभन्दा उच्च हो।

क्वीन्सका विधायक ममदानीले गत वर्ष मात्रै सीमित परिचयका साथ प्रतिस्पर्धा गरेका थिए। तर, किफायती जीवनका मुद्दा, सामाजिक सञ्जालमा उनको प्रभावशाली उपस्थिति र न्युयोर्कप्रतिको सकारात्मक अभियानले युवा र आप्रवासी मतदातामा अभूतपूर्व उत्साह जगायो। यही समर्थनले उनलाई अनुभवी प्रतिद्वन्द्वीहरूलाई पछि पार्दै विजयी बन्ने मार्ग प्रशस्त गर्‍यो।

अब उनी न्युयोर्क सिटीका १९औँ शताब्दीदेखिका सबैभन्दा युवा, पहिलो मुस्लिम र पहिलो दक्षिण एसियाली मूलका मेयर बनेका छन्। युगान्डामा भारतीय मूलका अभिभावकबाट जन्मेका ममदानी सन् १९७० को दशकमा अब्राहम बीमपछि मेयर बन्ने पहिलो व्यक्ति पनि हुन्।

ममदानीले आफ्नो अभियानलाई सहरको पुरानो राजनीतिक र व्यापारिक प्रतिष्ठानविरुद्धको ‘जनताको विद्रोह’का रूपमा अघि सारेका थिए। उनले धनीमाथि कर वृद्धि, सार्वजनिक बस र बाल हेरचाह सेवा निःशुल्क गर्ने, भाडा स्थिर अपार्टमेन्टहरूको भाडा स्थिरता कायम गर्ने र प्रहरी विभागमा संरचनात्मक सुधार ल्याउनेजस्ता नीतिहरू प्रस्तुत गरेका छन्।

तर जनवरी १ मा पदभार ग्रहण गर्दा उनलाई चुनौतीहरूको लामो सूची सामना गर्नुपर्नेछ। धेरै यहूदी समुदायका न्युयोर्कवासी र व्यापारिक वृतमा उनको प्रति गहिरो अविश्वास रहेको बताइन्छ।

त्यसैगरी, राष्ट्रपति ट्रम्पले पनि ममदानीमाथि कडा टिप्पणी गर्दै उनलाई ‘मेरो सानो कम्युनिस्ट मेयर’ भनेर व्यङ्ग्य गरेका थिए। उनले पूर्व गभर्नर कुओमोलाई औपचारिक समर्थन गर्दै चेतावनी दिएका थिए — यदि ममदानीले आफ्नो मनपर्दैन भन्ने नीतिहरू अघि बढाए भने संघीय कोष कटौती गरी न्युयोर्कमा राष्ट्रिय गार्ड तैनाथ गर्न पछि नपर्ने।

Pages: 1 2