नेपाल प्रहरीका पचास जना घुमुवा मुख्यालय झिकाइए,विवादित पात्रलाई महत्त्वपूर्ण जिम्मेवारी

वीरगंज ।

आसन्न निर्वाचनलाई मध्यनजर गर्दै नेपाल प्रहरी मुख्यालयभित्रै ‘अतिरिक्त आम्दानी’को चलखेल नहोस् भन्ने चिन्ताले सतह छोएको छ। यही चिन्ताका बीच नेपाल प्रहरीका महानिरीक्षक दानबहादुर कार्कीको निर्देशनमा देशभर ‘घुमुवा प्रहरी’को रूपमा काम गरिरहेका तथा गरिसकेका भूतपूर्व र वर्तमान गरी करिब ५० जना प्रहरी कर्मचारीलाई आकस्मिक रूपमा प्रहरी मुख्यालय, नक्साल काठमाडौं झिकाइएको छ।

मुख्यालय तानिएका प्रहरी कर्मचारीहरू विभिन्न दर्जाका छन्, प्रहरी नायब निरीक्षकदेखि प्रहरी जवानसम्म। तीमध्ये २० जना मधेश प्रदेशका रहेका छन्। मंगलबार सबैलाई मुख्यालयमा हाजिर गराइएपछि अधिकांशलाई गणमा थन्क्याइएको छ भने केहीलाई नयाँ जिम्मेवारी दिइएको छ। तर वर्षौँदेखि एउटै स्थानमा अड्डा जमाएर ‘सेवा–सत्कार’मा अब्बल मानिएका केही पात्रहरू भने यथावत् राखिएको स्रोतको दाबी छ।

प्रहरी जवानदेखि वरिष्ठ सईसम्मको जागिरे यात्रामा बारा जिल्लालाई कर्मथलो बनाएर ‘लखनउ लुट’ मच्चाएको आरोप लाग्दै आएका दीपक बस्नेतलाई जिल्ला प्रहरी कार्यालय बाराको क्राइम टोलीको इन्चार्ज बनाइनु ले मुख्यालयको निर्णयमाथि नै प्रश्न उठाएको छ।
एक दशकभन्दा बढी पथलैयामा ट्राफिक घुमुवाको रूपमा सक्रिय रहँदै अकूत सम्पत्ति कमाएको आरोप खेप्दै आएका बस्नेतले करिब ३ करोड रुपैयाँ ब्याजमा लगाएको चर्चा प्रहरी वृत्तमै चलिरहेको छ।
बस्नेतकै निर्देशनमा सहायक हवल्दार रत्नेश मण्डललाई पुनः पथलैयाको घुमुवा बनाएर पठाइएको स्रोत बताउँछ।
त्यस्तै वडा प्रहरी कार्यालय विर्ता, वीरगंजमा कार्यरत एक प्रहरी हवल्दारलाई मधेश प्रदेश तानेर पुनः बारा बोलाइनु पनि सामान्य संयोग मात्र नभएको संकेत गरिएको छ।

मधेश प्रदेश जनकपुरमा वरिष्ठ सई गोपाल थापा मगरलाई डीआईजीभन्दा बढी प्रभाव हुने गरी प्रहरी मुख्यालयबाटै खटाइएको छ। उनलाई प्रदेशभर घुमुवा प्रहरी परिचालन, असुली सञ्जाल र उठ्तीपुठ्तीको सूक्ष्म अध्ययन तथा अनुसन्धान गर्ने जिम्मेवारी दिइएको बताइन्छ। उनकै लाइनमा वरिष्ठ सई जयलाल यादव र प्रहरी वरिष्ठ हवल्दार सुरेन्द्र साहलाई धनुषामा असुली व्यवस्थापनका लागि खटाइएको छ।

त्यसैगरी प्रहरी हवल्दार बच्चा यादव र प्रहरी जवान ‘कबीर’ भनिने राकेश यादवलाई सप्तरी–महोत्तरीको हरहिसाब हेर्ने जिम्मेवारी दिइएको स्रोतको दाबी छ। भैरहवा नाकामा सई सन्तोष रायमाझीले दुई दशकदेखि निर्वाध रजगज गर्दै आएका छन्। पाल्पा मूल घर भएका रायमाझीले भैरहवा एसएसपी कार्यालय पछाडि भव्य बङ्गला र बुटवल राजमार्ग चौराहाको दक्षिण–पश्चिम कुनामा पाँचतले घर निर्माण गरी भाडामा लगाएको खुलासा भएको छ।

उनको टोलीमा असई पदम भण्डारी, सुरेन्द्र चन्द र प्रहरी जवान अखिलेश यादव सक्रिय रहेको बताइन्छ। हाल प्रहरी हवल्दार गङ्गा खत्री, जागेश्वर महतो र प्रहरी सहायक हवल्दार सुनील ठाकुर कोशी प्रदेशभर घुमुवा गतिविधि बढाउँदै हिँडिरहेको स्रोतको दाबी छ।

मुलुक निर्वाचनतर्फ केन्द्रित भइरहेका बेला नेपाल प्रहरी मुख्यालय स्वयं ‘अतिरिक्त आम्दानी’को लेखा जोखामा केन्द्रीत हुनु ले गम्भीर प्रश्न उठेको छ।