रास्वपा उम्मेदवारको गाडीको ठक्करबाट बालिकाको मृत्यु, गाडी चालक फरार

विरगंज ।

रौतहटको ईशनाथ नगरपालिकामा राष्ट्रिय स्वतन्त्र पार्टी (रास्वपा) का उम्मेदवार सवार सवारी साधनको ठक्करबाट एक बालिकाको ज्यान गएको छ। रौतहट क्षेत्र नम्बर २ बाट रास्वपाका उम्मेदवार सगिर आलम चढेको बा १५ च ४२४४ नम्बरको क्रेटा गाडीले ठक्कर दिँदा ईशनाथ नगरपालिका-४, मठिया टोलकी करिब ४ वर्षीया अलसा खातुनको मृत्यु भएको हो। मृतक बालिका सोही स्थानका बासिन्दा शेख साजिरकी छोरी हुन्। स्थानीयका अनुसार आफ्नै वडाभित्र भएको उक्त दुर्घटनालगत्तै गाडीमा सवार उम्मेदवार आलम र चालक दुवै घटनास्थलबाट फरार भएका छन्।

प्रहरीले ठक्कर दिने गाडीलाई नियन्त्रणमा लिएर घटनाको विस्तृत अनुसन्धान सुरु गरेको छ। दुर्घटनापछि उम्मेदवार र चालक फरार रहेकाले उनीहरूको खोजी कार्य तीव्र पारिएको र दोषीमाथि कानुनी कारबाहीको प्रक्रिया अघि बढाइने प्रहरी स्रोतले जनाएको छ। आफ्नै बस्तीमा भएको यस दुःखद घटनापछि स्थानीय शोक र आक्रोशमा छन् भने प्रहरीले स्थिति नियन्त्रणमा लिँदै थप अनुसन्धानलाई प्राथमिकता दिएको छ।