शुल्कको विषयलाई लिएर भ्रामक प्रचार गरिएको भन्दै गौतम स्कुलको आपत्ति

वीरगञ्ज ।

वीरगञ्जस्थित प्रतिष्ठित शैक्षिक संस्था गौतम माध्यमिक विद्यालयले पछिल्लो समय सामाजिक सञ्जाल र केही सञ्चारमाध्यममा आफ्नो संस्थाविरुद्ध भइरहेको भ्रामक तथा एकपक्षीय प्रचारबाजीप्रति गम्भीर ध्यानाकर्षण भएको जनाएको छ। विद्यालयले एक सार्वजनिक वक्तव्य जारी गर्दै अघिल्लो शैक्षिक सत्रको बाँकी शुल्क भुक्तानी गर्न अभिभावकलाई गरिएको विनम्र आग्रहलाई तोडमोड गरी संस्थाको प्रतिष्ठामाथि योजनाबद्ध प्रहार गरिएको दाबी गरेको छ। यसै विषयलाई लिएर शान्ति क्षेत्र घोषित विद्यालयका प्रिन्सिपलको कार्यकक्षमै समूह बनाई प्रवेश गर्ने र अमर्यादित गतिविधि गर्ने अनाधिकृत व्यक्तिहरूको कार्य निन्दनीय भएको र यसले सभ्य समाजको प्रतिनिधित्व नगर्ने विद्यालयले प्रस्ट पारेको छ।
समयमै शुल्क नबुझाउने बरु उल्टै विभिन्न निकायमार्फत अनावश्यक प्रशासनिक र मानसिक दबाब सिर्जना गर्ने प्रवृत्तिले विद्यालयलाई ठूलो आर्थिक भार परेको वक्तव्यमा उल्लेख छ। नियमअनुसार छात्रवृत्ति र शुल्क छुटको व्यवस्था गरिँदै आए पनि केही प्रभावशाली व्यक्तिहरूले अनुचित रूपमा ‘सोर्स-फोर्स’ लगाएर छात्रवृत्तिका लागि दबाब दिने र आफ्नो निहित स्वार्थ पूरा नभएपछि सामाजिक सञ्जालमा दुष्प्रचार गर्ने गरेको विद्यालयको गुनासो छ। संस्थाले प्रेस स्वतन्त्रताको उच्च सम्मान गर्ने जनाउँदै अपुष्ट र एकपक्षीय समाचारले हजारौं विद्यार्थीको भविष्य र शिक्षकको मनोबलमा गम्भीर असर पर्ने भएकाले जिम्मेवार पत्रकारिताको मर्म पालना गर्न सञ्चारमाध्यमलाई आग्रह समेत गरेको छ।
प्रशासनिक कामकारबाहीका क्रममा अन्जानमै हुन सक्ने मानवीय वा प्राविधिक त्रुटिलाई स्वीकार गर्दै विद्यालयले सानातिना समस्यालाई सामाजिक सञ्जालमा छताछुल्ल पार्नुको सट्टा प्रत्यक्ष संवाद र समझदारीबाटै समाधान खोज्न अभिभावक तथा सरोकारवालालाई अनुरोध गरेको छ। वि.सं. २०३३ सालमा स्थापना भई ५०औं वर्षको ऐतिहासिक यात्रामा प्रवेश गर्न लागेको यस विद्यालयले विगतका अनेकौं राजनीतिक, सामाजिक र आर्थिक सङ्कट पार गर्दै निरन्तर गुणस्तरीय शिक्षा प्रदान गर्दै आएको स्मरण गराएको छ। ‘हामी बोल्नु पर्दैन, काम आफैं बोल्छ’ भन्ने मान्यता बोकेको यस शैक्षिक संस्थाले विद्यालयलाई सम्पूर्ण समुदायको साझा सम्पत्तिका रूपमा लिँदै आगामी दिनमा सबै पक्षबाट थप जिम्मेवार, सकारात्मक र सहयोगात्मक भूमिकाको अपेक्षा गौतम स्कूल परिवार द्वारा जारी विज्ञप्तिमा उल्लेख छ।