रुँगटाको पक्षमा चुनावी माहोल बन्दै

धीरेन्द्र बहादुर श्रेष्ठ,

वीरगञ्ज ।

नेपाली कांग्रेसको विशेष महाधिवेशन सफलतापूर्वक सम्पन्न भएसँगै पार्टीभित्र मात्र होइन, बाहिर पनि नयाँ र सकारात्मक ऊर्जाको सञ्चार भएको छ। युवा नेता गगन थापाले पार्टी सभापतिको जिम्मेवारी सम्हालेपछि देशव्यापी रूपमा कांग्रेसप्रति जनविश्वास उल्लेख्य रूपमा बढेको देखिन्छ। परम्परागत नेतृत्व शैलीलाई तोड्दै उनले अपनाएको नवीन कार्यशैली र स्पष्ट वैचारिक मार्गचित्रले आम मतदाता, विशेषतः युवा पुस्तामा ठूलो आशा र उत्साह जगाएको छ।

यसैक्रममा, नवनिर्वाचित सभापति थापाले काठमाडौँकेन्द्रित आरामदायी राजनीति त्यागेर मधेश प्रदेशको सर्लाही-४ बाट चुनाव लड्ने साहसिक तथा रणनीतिक निर्णय गरेपछि मधेशमा कांग्रेसको पुरानो राजनीतिक विरासत पुनःस्थापित हुने संकेत देखिन थालेको छ। सभापतिको यस कदमलाई मधेशका जनताले आफ्नो क्षेत्रप्रतिको सम्मान र अपनत्वको स्पष्ट सन्देशका रूपमा लिएका छन्।

केन्द्रीय नेतृत्वमा आएको यस सकारात्मक परिवर्तनको प्रत्यक्ष र गहिरो प्रभाव पर्सा निर्वाचन क्षेत्र नम्बर १ मा स्पष्ट रूपमा देखिन थालेको छ। वीरगञ्ज जस्तो औद्योगिक विकास र राजनीतिक चेतना उच्च रहेको क्षेत्रमा मतदाताहरू अब ‘काम गर्ने’ र ‘दाग नलागेका’ नेतृत्वको खोजीमा छन्। केन्द्रमा गगन थापाको स्पष्ट भिजन र स्थानीय स्तरमा उम्मेदवारको व्यक्तित्वबीचको सन्तुलनले यहाँको चुनावी माहोल क्रमशः कांग्रेसको पक्षमा ढल्किँदै गएको विश्लेषण गरिँदै छ। सभापति थापाको मधेश आगमनले सिर्जना गरेको राजनीतिक लहरलाई पर्सा–१ मा मतमा रूपान्तरण गर्न स्थानीय नेतृत्वको छविले निर्णायक भूमिका खेलिरहेको देखिन्छ।

यस सन्दर्भमा, पर्सा–१ मा कांग्रेसका तर्फबाट अनिल रुँगटाको सक्रियता र चर्चाले विपक्षी क्याम्पमा समेत हलचल ल्याएको छ। लामो समयदेखि राजनीति र समाजसेवामा सक्रिय रुँगटाको सबैभन्दा बलियो पक्ष भनेकै उनको स्वच्छ र निष्कलंक छवि हो। भ्रष्टाचार, विवाद वा कुनै पनि किसिमका काण्डमा नजोडिएका उनी एक सालिन, जिम्मेवार र विकासप्रेमी नेताका रूपमा परिचित छन्। औद्योगिक पृष्ठभूमि भएका कारण यस क्षेत्रको आर्थिक विकास, उद्योग प्रवर्द्धन र रोजगारी सिर्जनाका विषयलाई व्यवहारिक रूपमा सम्बोधन गर्न सक्ने क्षमतामाथि मतदाताहरूको भरोसा बढ्दो छ। केन्द्रमा गगन थापा जस्तो ऊर्जाशील नेतृत्व र स्थानीय स्तरमा अनिल रुँगटा जस्तो बेदाग अनुहारको संयोजनले पर्सा–१ मा कांग्रेसलाई ऐतिहासिक नतिजा दिलाउन सक्ने बलियो आधार तयार भएको छ।

नयाँ नेतृत्वसँगै कांग्रेसले अघि सारेको समावेशी, पारदर्शी र विकासमुखी नीतिले पर्साका जनतामा भरोसा थप सुदृढ बनाएको छ। अनिल रुँगटाको सरल व्यक्तित्व र विगतको निष्कलंक ट्र्याक रेकर्डले सर्वसाधारणको आकर्षण निरन्तर बढ्दै गएको देखिन्छ। मधेशमा कांग्रेसको पुनरोदयको यो अभियानमा पर्सा–१ ‘मोडेल’ निर्वाचन क्षेत्रका रूपमा स्थापित हुने र अनिल रुँगटाको सम्भावित जितले सुशासन तथा विकासको नयाँ अध्याय सुरु गर्ने अपेक्षा गरिएको छ।