वीरगञ्ज ।

वरिष्ठ पत्रकार ईश्वरचन्द्र गौतम ‘सुदर्शनराज पाण्डे स्मृति पत्रकारिता पुरस्कार–२०८२’ बाट पुरस्कृत भएका छन्। पत्रकारिता क्षेत्रको व्यावसायिकता, विश्वसनीयता र संस्थागत सुदृढीकरणमा पुर्‍याएको अतुलनीय एवं दीर्घकालीन योगदानको उच्च कदर गर्दै नेपाल पत्रकार महासंघ, पर्सा शाखाले उनलाई उक्त पुरस्कार प्रदान गरेको हो। लामो समयदेखि सत्यतथ्य समाचार सम्प्रेषणमा अडिग रही आफ्नो कर्मनिष्ठा र समर्पित भावनामार्फत समग्र पत्रकारिता जगत्‌लाई नयाँ ऊर्जा र मार्गदर्शन प्रदान गरेको भन्दै उनलाई यस सम्मानबाट विभूषित गरिएको हो।
प्रतिनिधिसभा सदस्य माननीय हरि पन्तको प्रमुख आतिथ्य तथा नेपाल पत्रकार महासंघ पर्सा शाखाका अध्यक्ष ओमप्रकाश खनालको सभापतित्वमा सम्पन्न एक विशेष समारोहका बीच उक्त पुरस्कार वितरण गरिएको हो। समारोहमा प्रमुख अतिथि सांसद पन्तले वरिष्ठ पत्रकार गौतमलाई नगद २५ हजार रुपैयाँ, प्रमाणपत्र, दोसल्ला र फूलमाला लगाएर पुरस्कृत गरेका हुन्। कार्यक्रमका वक्ताहरूले स्वर्गीय सुदर्शनराज पाण्डेले नेपाली पत्रकारिता क्षेत्रमा पुर्‍याएको विशिष्ट योगदानको स्मरण गर्दै उनको मार्गनिर्देशन आज पनि उत्तिकै सान्दर्भिक रहेको औंल्याएका थिए। साथै, अग्रजलाई सम्मान गर्ने परम्पराको थालनी गरेकोमा महासंघको पर्सा शाखाको विशेष प्रशंसा गरिएको थियो।
कार्यक्रममा नेपाल पत्रकार महासंघका केन्द्रीय सचिव अशोक तिवारी, लेखा समिति संयोजक केसी लामिछाने, पूर्व केन्द्रीय सचिव दीपेन्द्र चौहान र नेपाल पत्रकार महासंघ मधेस प्रदेसका अध्यक्ष श्याम बन्जारा लगायतका अतिथिहरूले मन्तव्य राखेका थिए। पुरस्कृत व्यक्तित्व गौतमको व्यावसायिक निष्ठा र निरन्तरताको चर्चा गर्दै उनको सुस्वास्थ्य र दीर्घायुको कामना गर्दै सो सम्मान गौतमको निवास स्थान कुम्हाल टोलमा प्रदान गरिएको थियो। उक्त सम्मान कार्यक्रमको सञ्चालन नेपाल पत्रकार महासंघ पर्सा शाखाका सचिव बिजय कुमार महतोले गरेका थिए।