कांग्रेस महामन्त्री पौडेलको आह्वानः चुपचाप हैन गर्वका साथ रूखमा छाप

काठमाडौँ ।

नेपाली कांग्रेसका महामन्त्री एवं प्रतिनिधि सभा निर्वाचन काठमाडौँ क्षेत्र नम्बर ५ का उम्मेदवार प्रदीप पौडेलले बहस बिना नै मत माग्ने प्रवृत्तिमाथि कटाक्ष गर्दै नीति र एजेण्डामाथि बहस गरेर मत मागिनु पर्ने बताएका छन् ।

सामाजिक सञ्जालमार्फत धारणा राख्दै उनले देश विकासका १० भिजन सहितका एजेण्डाबारे बहस गर्न कांग्रेस तयार रहेको भन्दै प्रष्ट बुझेर निर्णय गर्ने स्वतन्त्रता नागरिकमा रहेको उल्लेख गरेका छन् ।

राष्ट्रिय स्वतन्त्र पार्टीका तर्फबाट शुरू गरिएको चुपचाप मतदानको विषयतर्फ संकेत गर्दै महामन्त्री पौडेलले भनेका छन्, ‘लोकतन्त्रमा कुनै पनि विषयमा प्रष्ट जानेर र बुझेर आवश्यक निर्णय गर्ने स्वतन्त्रता सबै नागरिकलाई रहन्छ ।’

उनले कांग्रेस देशको अबको मार्गचित्रबारे प्रष्ट रहेको र देश निर्माणका १० भिजनबारे बहस गर्न खुला रहेको भन्दै यसमा आफूहरूले गर्वसमेत गर्ने बताए ।

महामन्त्री पौडेलले लेखेका छन्, ‘त्यसैले, अब चुपचाप हैन फागुन २१ गते गर्वका साथ रूखमा छाप !’