कांग्रेसको पक्षमा माहोल बनाउन गगन थापा वीरगन्ज आउँदै, शनिबार बीपी उद्यानमा विशेष सम्बोधन

विरगंज ।
नेपाली कांग्रेसका सभापति गगनकुमार थापा आगामी फागुन १६ गते शनिबार पर्साको वीरगन्ज आउने भएका छन्।

आसन्न निर्वाचनमा नेपाली कांग्रेसका उम्मेदवारको पक्षमा मत माग्न र चुनावी सभालाई सम्बोधन गर्न उनी वीरगन्ज आउन लागेका हुन्। वीरगन्जको घण्टाघरस्थित बीपी उद्यानमा बिहान ११:३० बजे आयोजना हुने विशेष कार्यक्रममा उनले सम्बोधन गर्ने कार्यक्रम तय भएको छ।
नेपाली कांग्रेस पर्सा क्षेत्र नम्बर २ का क्षेत्रीय सभापति मोहम्मद साहवुद्दिनले दिएको जानकारीअनुसार, थापाको स्वागत र कार्यक्रमको सम्पूर्ण तयारी तीव्र रूपमा अगाडि बढाइएको छ।

निर्वाचनको सँघारमा हुन लागेको यस भ्रमणले स्थानीय स्तरमा पार्टीका नेता, कार्यकर्ता तथा मतदातामा थप उत्साह जगाउने र चुनावी माहोललाई कांग्रेसको पक्षमा मजबुत बनाउने विश्वास पार्टीले लिएको छ।