वीरगन्जको मुख्य सडक २५–२५ मिटर फराकिलो बनाइने, संरचना भत्काउन सडक डिभिजनको तयारी तीव्र

विरगंज ।

लामो समयदेखि अवरुद्ध वीरगन्जको मुख्य सडक (त्रिभुवन राजपथ) विस्तारको काम शनिबार साँझदेखि विधिवत् रूपमा अघि बढ्ने भएको छ। सर्वोच्च अदालतले गत फागुन २८ गते सडक विस्तारविरुद्ध परेको रिट खारेज गर्दै सरकारको पक्षमा फैसला गरेसँगै यस आयोजनाले गति लिएको हो। सडक डिभिजन कार्यालय हेटौंडाका अनुसार, गण्डक चोकदेखि मितेरी पुलसम्मको खण्डमा सडकको मध्यभागबाट दायाँ–बायाँ २५–२५ मिटर विस्तार गर्ने कार्य अब कार्यान्वयनको चरणमा प्रवेश गरेको छ।
सडकको मापदण्डभित्र पर्ने घर, टहरा तथा अन्य भौतिक संरचना हटाउन नौवटा डोजर, एक्साभेटर र जेसीबीसहितका भारी उपकरण वीरगन्जमा परिचालन गरिएको छ। सडक डिभिजनका अनुसार पाँचवटा छुट्टाछुट्टै स्थानबाट एकैसाथ संरचना भत्काउने अभियान थालिनेछ। यस बृहत् विस्तार योजनाअन्तर्गत वीरगन्जका प्रमुख व्यावसायिक तथा आवासीय क्षेत्रहरू— गण्डक चोक, पावरहाउस, मुर्ली, घण्टाघर, माइस्थान, आदर्शनगर, मकालु होटल चोक, वीर्ता, छपकैया हुँदै भन्सार र मितेरी पुलसम्मको भूभाग समेटिएको छ।
यस अभियानलाई व्यवस्थित रूपमा सञ्चालन गर्न शनिबार साँझ वीरगन्ज महानगरपालिकामा सरोकारवाला निकायहरूको समन्वय बैठक बस्दैछ। बैठकमा महानगरसहित सडक डिभिजन, नापी, टेलिकम, खानेपानी र विद्युत् प्राधिकरणका प्रमुखहरूले संरचना हटाउँदा आउन सक्ने प्राविधिक चुनौतीबारे छलफल गर्नेछन्। सडक विभागले वि.सं. २०६९ सालदेखि नै संरचना खाली गर्न सूचना जारी गर्दै आएको भए पनि २०७६ सालमा करिब एक हजार दुई सय घरधनीले मुआब्जा र वैकल्पिक मार्गको माग गर्दै सर्वोच्चमा रिट दायर गरेपछि यो प्रक्रिया रोकिएको थियो। हाल नापीलगायतका सम्पूर्ण प्राविधिक कार्य पूरा भइसकेको र कानुनी अड्चनसमेत अन्त्य भएकाले वीरगन्जको मुख्य सडक फराकिलो बन्ने निश्चित भएको छ।