ओलीको तस्वीर खोई ? खोपिको देउता

( स्तम्भकार कुमार रुपाखेती )

एमालेमा मनमोहन अधिकारी पार्टी अध्यक्ष रहँदा निर्वाचनमा उम्मेदवारहरूले पर्चा–पम्पलेटहरू र पोस्टरमा अध्यक्ष मनमोहन अधिकारीको भीमकाय फोटो राखेर भोट माग्दथे ।

एकपटक त अध्यक्ष मनमोहन अधिकारीको ठूलो पोस्टरमा यस्तो लेखिएको थियो– “अल्पमतको होइन, बहुमतको सरकार” । मनमोहन अधिकारी, पुष्पलाल श्रेष्ठ र मदन भण्डारीको तस्वीर, फोटो देखाएर एमालेले भोट माग्थ्यो । त्यसअघि निर्वाचनमा एमालेले माओ त्सेतुङ, लेनिन, मार्क्सको फोटोहरूलाई समेत प्राथमिकता राखेको थियो । एमालेको महाधिवेशनमा ओली बम्पर भोट ल्याई अध्यक्ष बने । घाँटीको गम्छा, पानीको बोतल पानीको जारमा समेत ओलीको फोटो टासेर छापेर हिँड्ने एमालेले अहिले ओलीको तस्वीर गायब गरेको देखिन्छ ।

मेचीदेखि महाकालीसम्मका उम्मेदवारहरूले यस निर्वाचनको प्रचार–प्रसारमा कतै पनि ओलीको पोस्टर, फोटो, उपस्थिति को प्रयोग गरेका छैनन् । आखिर किन ? सबैलाई थाहै छ विभिन्न कारणहरूले अहिले एमालेको खस्ताहाल छ । त्यसमा ओलीको फोटो बाफ रे बाफ ।

त्यस्तै विगतका निर्वाचनहरूमा मुलुकका विभिन्न भागमा चुनावी सभा गर्दा ओली प्रमुख वक्ता बन्थे र उम्मेदवार मख्ख पर्थे । तर यसपालि एमालेका उम्मेदवारहरूले निम्ता नदिएको हो अथवा ओलीलाई एमाले उम्मेदवारहरूले नरुचाएको हो । ओली त अहिले स्थानहद जस्तै झापामा आफ्नै क्षेत्रमा कैदझैँ छन् ।

पूर्व मन्त्री राजीव पराजुलीले आफ्नो फेसबुक पोस्टमा “ओली किन गायब” भन्दै जिज्ञासा राखेका छन् । राजीव पराजुलीको यो जल्दोबल्दो प्रश्नको जवाफ शायद एमालेसँग छैन किनकि जेनेजी कारवाहीको ताण्डव, एमालेको महाधिवेशनको धमाचौकडीले ओलीको राजनैतिक ग्राफ निचला स्तरमा खस्केको छ । बिहारमे लालु– समोसेमे आलु” जस्तै दयनीय हालतमा छन् एमाले अध्यक्ष । त्यसैले जनताले नकारिसकेको भनेर यस आमनिर्वाचनमा ओली गायब छन्, ओलीको फोटो हराएको छ । सबै अंग भएको तर टाउको नभएको भूतलाई “मुरकट्टा भूत” भनिन्थ्यो । मुरकट्टा भूत भनेपछि हामी बचपनमा खुबै डराउँथ्यौं । कोटाकेटीको कथा याद आउँदा रौँ खडा हुन्छ ।

होलीमा रंग दल्नेसित होइन, रंग बदल्नेसित सावधान होसियार बनौँ । एमालेले ओलीको गैरहाजिरी गरेर, झापामा सीमित बनाएर, फोटो गायब गर्नुले एमालेभित्रै ओलीलाई नपत्याउने जमात सक्रिय भएको तथा चुनावी दौडाहामा ओलीलाई प्रचारमा लाँदा त्यहाँको उम्मेदवार समेत हार्न सक्ने भएकाले ओलीलाई एमालेले “खोपिको देउवा” बनाएको हो कि भन्ने शंका–उपशंका मतदातामा देखिन्छ । ओलीलाई चुनावी कमाण्डर बनाए एमालेको रहलपहल अवस्था समेत गइगुज्रल हुन सक्छ । ओलीको चलनचल्तीले गर्दा एमालेभित्र मदन भण्डारीको “जनताको बहुदलीय जनवाद” ओझेलमा परिसकेको छ रे ।

त्यसैले त योगेश भट्टराई, बिन्दा, उषा किरणहरू टिकटबाट वञ्चित भए, नवप्रवेशीहरूको खाँडो जाग्यो, टिकट पाए ।
निर्वाचनमा “ओली हराएको सूचना” बहसमा झिक्नु पर्ला । यो निर्वाचनमा ओलीको बेतुका उखानटुक्का सुन्नै पाइएन यार ।

एजेन्डाविहीन ओलीविहीन एमाले, वाह रे एमाले ।